Anëtarësohu në forum

KRYESIA E KOMUNITETIT MUSLIMAN SHQIPTAR
NË SH.B.A.- DHE KANADA

P.O.BOX 010 238 ST GEORGE P.O. S.I. 10301 USA
Tel : (718) 390 0748   Fax.(718) 390 0946
 

Letër e hapur drejtuar presidentit të Shqipërisë

President Alfred Moisiu,

Jemi shumë të indinjuar për deklaratën tuaj të bërë në Universitetin e Oksfordit në Angli. Kjo deklaratë ka shkaktuar një tërmet në mesin e shqiptarëve musliman si brenda atdheut ashtu edhe jashtë tij. Gjithashtu besojmë se të njëjtën gjë, e kanë përjetuar edhe shqiptarët e besimit të krishterë me të gjitha sektet e tij.

Deklarata juaj i përngjet sulmeve të stilit Don Kishotian kur sulmonte mullinjtë e erës, me pretekst se po sulmonte armiqtë e tij. I nderuar zotëri President, a mendoni vallë se ata që ishin në audiencën e Universitetit të Oksfordit nuk janë të vetëdijshëm për përkatësinë fetare të popullit shqiptar? Nëse  nuk  jeni i vetëdijshëm se  anglezët dhe ata që studiojnë në Oksford janë të informuar për përkatësinë fetare të shqiptarëve kjo është një fatkeqësi e madhe. Por nëse je i vetëdijshëm se ata e dinë të vërtetën se shumica dërrmuese e shqiptarëve në Shqipërinë zyrtare dhe në trojet e tjera shqiptare në ballkan janë të përkatësisë së besimit Islam, kjo është fatkeqësi edhe më e madhe.

Si është e mundur të shkohet në Oksford dhe të flitet për gjëra të pavërteta e demagogji? Si mund të kuptohet objektiva e deklaratës së tillë? A dëshironit që të fitoni simpatinë e audiencës në sallë dhe të perëndimorëve në përgjithësi, duke u shprehur  me atë se ‘’shqiptarët janë më shumë të krishterë, e bile nëse i  gjurmon pak më shumë do ti gjesh se edhe ata që thonë se janë musliman në fakt janë të krishterë dhe se Krishterimi qenka burimorë e  Islami qenka sipërfaqësorë‘’!

Të vetëdijshëm për metodat e veprimeve të sistemit të vjetër komunist, na shkon mendja për një moment, ndoshta  “nëna parti” e ka obliguar presidentin të shkojë e të përhapë propagandën demagogjike që nuk është në shërbim të askujt por vetëm në dëm të vetë presidentit dhe të klasës sunduese në Shqipëri. Ndryshe, do të dukeni edhe më qesharak para botës së civilizuar!!!

Ju nuk keni shkuar në ndonjë kafene të Londrës e të flisni për identitetin fetar shqiptar, por keni  ligjëruar në Universitetin më prestigjioz në Britani dhe në botë. Ligjërimi në këtë universitet shekullorë, krenaria e Anglisë dhe botës përendimore, është një nder e respekt i madh për secilin person. Si keni mundur t’ia lejoni vetes, që në emër të shqiptarëve t’i thoni ato të pavërteta? A mos menduat për një çast zotëri president se jeni në mbledhjen e partisë dhe po flisni rreth planit pesëvjeçar?!

Si duket epidemia e komunizmit ende mban nën kontroll mentalitetin e një klase të madhe të intelektualëve shqiptarë e në mesin e tyre fatkeqësisht edhe juve zotëri President.

A mund të na thoni Zotëri President, a keni menduar se më këtë deklaratë do t’i nëpërkëmbni ndjenjat e qytetarëve që ju i përfaqësoni, apo kjo pak prishë punë në axhendën tuaj. Sistemi monist në Shqipëri nuk pyeti për  identitetin e shqiptarëve për një gjysmë shekulli dhe  deshi t’i bëjë një herë jugosllavë e më vonë rusë, kinezë e më pas edhe koreanë apo kubanezë. Thua se ky popull nuk ka rrënjë në histori e asnjëherë nuk ka pasur ndonjë identitet fetar e kombëtar.  A mendoni  se të pavërtetat që ia thonit botës në atë kohë do t’ua beson kush sot. Apo mendoni se ende shqiptarët janë nën ndikimin e etheve të komunizmit, e nuk janë në gjendje të flasin me fakte për vetveten?

Ajo që ju keni bërë në Oksford është një vazhdimësi e politikës së mbrapshtë të presidentit të Kosovës, Dr. Ibrahim Rugova i cili edhe përkundër faktit se shumica absolute e shqiptarëve të Kosovës janë kundër ndërtimit të kishës politike mbi gërmadhat e shkollës së mesme në Prishtinë, vuri gurëthemelin e saj! Kush pyet popullin dhe vullnetin e tij përderisa presidenti i inspiruar nga fotografia që e mban në zyrën presidenciale sheh interesin e Kosovës në ndërtimin e katedrales politike mbi kështjellën e diturisë! Thuase ai ishte i vetmi truall i përshtatshëm mbi të cilin duhej të ndërtohej kisha!

Zotëri President, a mund të na thoni se ku qëndron demokracia dhe liria e shqiptarëve muslimanë? Sipas “demokracisë” që  ju pretendoni se qeveriset Shqipëria dhe sipas asaj që pretendon edhe  vëllau juaj në Kosovë, zotëri Rugova duhet të merret parasysh vullneti i popullit të cilin udhëhiqni. Por ju po veproni në të kundërtën, pra nuk ka asnjëfarë ndryshimi midis qëndrimeve tuaja si president dhe Rugovës, me qëndrimet e Enver Hoxhës që në emër të popullit, shtypi e vrau po atë popull të mjerë në mënyrën më barbare?

Ju flisni si të dëshironi, dhe ja bëni qejfin e hatrin çdokujt pos popullit tuaj, ashtu sikur bën edhe Rugova. Çdo gjë e krishterë çmohet dhe ruhet, ndërsa çdo gjë islame sulmohet. Një shami e një nëpunëse shqiptare në Organizatën e Kombeve të Bashkuara në Kosovë u shndërrua në eksplodim në masmediat shqiptare.

A mund të na thoni i nderuar President, demokracia është për tërë shqiptarët apo nga kjo duhet të përjashtohen shqiptarët muslimanë? D.m.th. për muslimanët nuk duhet të ketë as demokraci dhe as liri! A thua e vetmja mënyrë e fitimit të kësaj demokracie është konvertimi në diçka  tjetër përveç Islamit? A nuk është ky një inkuizicion i ri në shekullin e 21 zoti President?

Zotëri President, shpresojmë se ju nuk do t’i lejoni vetes të krahasoheni me Enver Hoxhën dhe diktatorët gjakëderdhës, që përherë kur emrat e tyre përmenden, shtohet neveria, dëshpërimi dhe hidhërimi i popullit. E tërë bota e di se populli shqiptar në përgjithësi i takon besimit Islam dhe një pjesë e tij besimit të krishterë. Shqiptarët me këtë diversitet fetarë dhe me bashkëjetesën dhe harmoninë e dëshmuar historikisht ishin dhe janë shembull i paqes, tolerancës dhe mirëqenies për botën. Asnjëhere nuk ka patur dhe besojmë se asnjëherë nuk do të ketë luftëra fetare në mesin tonë, përkundër asaj që dëshmojmë sot në Evropën e modernizuar. Krahaso Irlandën Veriore me Shqipërinë. Me deklaratën tuaj ju keni goditur shpirtin paqësor dhe tolerant të popullit shqiptar.

Nëse ju dëshironi me të vërtetë të shkoni në Evropë, sikur thuhet në deklaratat e shumë intelektualëve shqiptarë - atëherë trajtojini qytetarët tuaj me kriteret e BE-së, pranoni gabimin e bërë dhe kërkoni falje për atë që keni gabuar, dhe mos e kaloni ofendimin e madh që i bëtë kombit tonë, me fjalët abstrakte që i thatë Selim Muçës në Tiranë. Nësë nuk e bëni diçka të këtillë, atëherë do të duket fare qartë sa ethet e komunizmit sundojnë ende në Shqipërinë tonë, amë.

Sekretari i K.M.SH. në SHBA
Ferid Bedrolli