Anëtarësohu në forum

FORUMI MUSLIMAN I SHQIPËRISË

Dega Shkoder

Reagim

Shkoder, më 12.11.2005

“Tek çdo shqiptar pak po të gërmosh do të zbulosh thelbin e tij” që nuk mund ta dime se si mund të jetë.

Forumi Musliman Shqiptar, dega Shkodër, deklaron këtu para mediave indinjatën e tij madhore ndaj deklarimit presidencial shqiptar, në Forumin e Oxfordit me temën : “Toleranca ndërfetare në traditën e popullit shqiptar.” Na indinjon pa masë fakti se në këtë forum për tolerancën, presidenti konsensual i dy partive të mëdha politike, por jo i shqiptarëve, shfaqet ashtu siç mund të jetë një inkuizitor i papërsëritshëm për problemet fetare. Në mes të tjerash ai deklaron për të realizuar qëllimet e caktuara se: “Tek çdo shqiptar, pak po të gërmosh do të zbulosh thelbin e tij të krishterë”(Gazeta “Korrieri” 12.11.2005 fq5).

Presidenti ynë konsensual partiak, duke ekspozuar ndjesitë e tij fetaro-politike, në mënyrën më të keqe deklaron: “....tek çdo musliman shqiptar gjen 15 shekuj krishtërim,... nuk është e vërtetë se në vendin tonë jetojnë shumica me besimin musliman”! Duke vazhduar po aty :” Në pikëpamje vertikale, diakronike të gjithë shqiptarët janë të krishterë”! Kaq mjafton për të kuptuar se në Forumin e Oxfordit marrin pjesë gjithfarë politikanësh dhe presidentësh me mendësi inkuizicioniste mesjetare që me siguri presidenti ynë konsensualo-partiak, falë moshës së tij tepër kritike për një deklaratë të tillë mund të quhet e pafalshme. Deklarata të kësaj natyre ia zbehin vlerat këtij forumi.

Do të donim të ishte ndonjë lapsus i këshilltarëve presidencialë, por duke parë praninë e presidentit në cdo aktivitet të Janullatosit, varianti i lapsusit të këshilltarit rrezohet. Ne i themi presidentit konsensual politik, por jo të shqiptarëve, t’i administrojë mirë hapësirat ligjore që të jep posti dhe të mos bëhet shkaktar i indinjatave kolektive. Ndoshta presidenti ynë është ashtu siç deklaron, që nuk e njeh sasinë numerike dhe shpirtërore të muslimanëve, të cilët në festat e tyre fetare mbushin rrugët dhe sheshet jashtë institucioneve të kultit. Prandaj edhe indiferenca i kalon kompetencat e tij.

Në rast se nuk e di, ne i kujtojmë presidentit konsensual se në Shqipëri jetojnë rreth 2.5 milionë muslimanë, dhe kjo shumë në një shtet me 3 milion banorë, duhet t’ia kthjellojë mendjen atij sa për të tërhequr fjalët nga pasaktësitë që konsiderohen të shëmtuara.

Forumi Musliman Shqiptar, dega Shkodër, i konsideron këto deklara të pasakta dhe si pasojë edhe të shëmtuara.

Nuk mund të jetë e këshillueshme që në fund të mandatit të tij për arsye nga më të ndryshmet të deklarohen thënie të tilla që e kompromentojnë rolin e presidentit si një përfaqësues i ndëgjegjes së popullit.

Forumi Musliman Shqiptar
Dega Shkodër

_______________________________________________________

Njoftim për editorët:

Forumi Musliman i Shqipërisë është një organizatë e shoqërisë civile, qëllimi i të cilës është të luftojë racizmin, islamofobinë dhe ksenofobinë.

Për më shumë informacion vizitoni sajtin tonë: www.forumimusliman.org