Anëtarësohu në forum

Letër e hapur drejtuar Z. Moisiut, presidentit të Shqipërisë

Bruksel, më 17 nëntor 2005

I nderuar Z. President,

Federata e Xhamiave Shqiptare të Belgjikës dhe Imamet : Tasim Ramadani, Nuhi Shaqiri dhe Musa Mulaj, shprehin indinjatën më të thellë lidhur me deklaratat tuaja të bëra në forumin mbajtur në Oksford me titull : « Toleranca ndërfetare në traditën e popullit shqiptar ». Ndër të tjera, Z. Moisiu, lejoni vehten të thoni se : « islami në Shqipëri nuk është fe burimore, por e sjellë nga faktori ushtarak turk… sepse islamizmi në Shqipëri nuk është fe burimore, as fe e përhapur në kohën e origjinës, as besim rezidencial, por një dukuri e ardhur dhe e trashëguar në gjuhën dhe liturgjinë e atij faktori që e solli… Si rregull është një islamizëm i cekët. Tek çdo shqiptar, pak po të gërmosh do të zbulosh thelbin e tij të krishterë. » Vazhdoni duke thënë edhe se « te çdo musliman shqiptar, gjen 15 shekuj krishtërim », dhe se « nuk është e vërtetë që në vendin tonë, jetojnë shumica me besim islam… » por se « në pikëpamjen vertikale diakronike të gjithë shqiptarët janë të krishterë ». Më tej vazhdoni duke thëne se: « mund të konkludohet se deri në çfaqjen e faktorit politik, ushtarak dhe fetar osman, për njeriun shqiptar e rëndësishme ishte të ishte një i krishterë i devotshëm. »

Nuk mund të përjashtohen konvertimet sipas leverdisë së çastit ku Islami pranohej për shkak të përfitimeve që vinin prej tij ose për konformizëm në një shoqëri ku po shtohej mbizotërimi mysliman sikurse nuk mund të përjashtohet po ky fenomen për ta shpjeguar krishterizimin e shqiptarëve nga paganizmi në të cilin jetuan mijëra vite me rradhë.

Në të njëjtën mënyrë, mbizotërimi aktual i shoqërisë evropiano-krishtere, rrethanat ndërkombëtare në disfavor të myslimanëve dhe sigurisht debati i ashpër lidhur me pranimin e Turqisë në Bashkimin Evropian shtyn një serë konformistësh të orvatën të adoptojnë politikën e kameleonit. Kjo është një çeshtje private në të cilen askush nuk guxon të ndërhyjë përderisa kjo nuk cenon lirinë e te tjerëve. Por ama, Z. Moisiu, të abuzoni me funksionin tuaj në emër të popullit shqiptar duke bërë objekt pazari ndjenjat shpirtërore të tij dhe asgjësuar karakteristikat themelore të shumicës së tij, kjo është e papranueshme !

Këtu Z. Moisiu keni thyer vijën e kuqe!

Deklarata të tilla fyese kundër myslimanëve të bëra nga pushtetarë italian para disa muajsh kaluan në kanalet televizive botërore dhe detyruan ata të kërkojnë falje publike të menjëhershme. Krahasimi ndalët këtu, Z. President, sepse Italia është vend evropian me kultur evropiane dhe çdo shkelje të parimeve të njohura dhe te mbrojtura botërisht (liria e mendimit, respekti i bindjeve fetare dhe i institucioneve të saj, neutraliteti i shtetit përballë fesë, etj.) denohet me ligjë madje në Belgjikë ku jetojmë dhe kudo në Evropë, feja islame edhepse nuk është feja burimore e tyre e as fe e shumicës së popujve të tyre, trajtohet në mënyrë të barabarët dhe mësim-besimi inkuadrohet dhe jepet në programet shkollore zyrtare. Do t’ishte më se mirë, Z. Moisiu, që të merrnit shembull në pjesën e botës ku pretendoni të futeni, d.m.th. në Evropë dhe të promovonit vlerat e tolerancës ndërfetare dhe parimet që ushtrohen në të në vend që të gërmoni në shtresat shpirtërore të shumicës së popullit shqiptar për të gjetur një diçka që ju konvënon personalisht dhe që nuk mund të jetë ndryshe se e papajtueshme me funksionin që mbani.

Z. President, keni për detyrë, së paku morale, të kërkoni falje publikisht për fyerjen ndaj pjesës dërmuese të popullit shqiptar dhe identit të tij.

Kryesia e Federatës së Xhamiave Shqiptare në Belgjikë
Adresa : Rue des Ailes, 56
1030 Bruksel
Belgjikë

E-mail : fedexhamia-bel@hotmail.com